Gipuzkoako EHAEOak BALKOITU! jardunaldia hartuko du ostiral honetan, lehendik dauden etxebizitza-eraikinetan balkoiak gehitzeari buruzkoa
2024ko abenduaren 28
Euskal Herriko Arkitektoen Elkargo Ofizialaren (EHAEO) Gipuzkoako ordezkaritzak BALKOITU! jardunaldia hartuko du ostiral honetan, urriaren 30ean. Jardunaldiaren helburua da Euskal Autonomia Erkidegoan (EAE) lehendik dauden etxebizitza-eraikinetan balkoiak gehitzeko aukerak aztertzea. Egunean zehar, topaketari izena ematen dion ikerketaren emaitzak aurkeztuko dira, baita Euskadin eta Bartzelonan garatutako edo planteatutako benetako kasuak eta proiektuak ere, mota honetako esku-hartzeak bultzatzeko eta lehendik dagoen etxebizitza-parkearen bizigarritasuna hobetzeko. Horretarako, arkitekturako profesionalak eta ikertzaileak bilduko ditu esku-hartze horien oztopoak eta aukerak aztertzeko. Besteak beste, Jonander Agirre Mikelez eta Iñigo Ocamica Berbois arkitektoek, Grup Rearq taldeak (UPC) eta beSTe arkitektura agentzia bat estudioak hitzaldiak emango dituzte.
2022an, Eusko Jaurlaritzak bizigarritasunari buruzko 80/2022 Dekretua onartu zuen, lehendik dauden bizitegi-eraikinetan balkoiak gehitzeko aukera ematen duena. Hala ere, onartu zenetik, mota honetako proiektu gutxi gauzatu dira. BALKOITU! ikerketak horien garapena zailtzen duten oztopoak identifikatu eta gainditu nahi ditu, lurralde-azterketaren, Europako eta tokiko erreferentzien azterketaren, kasu praktikoen lanketaren eta EAEko eraikuntza-erronka espezifikoen analisiaren bidez. Ikerketaren emaitzak eta haren aplikazioak ostiraleko jardunaldian aurkeztuko dira, lehendik dauden bizitegi-eraikinetan bizigarritasuna eta bizi-kalitatea hobetzeko esku-hartze berriak garatzen lagunduko duten irtenbideak identifikatzeko xedearekin.
Jardunaldiak arreta berezia jarriko die dekretua aplikatzean sortzen diren zailtasunei eta hura ezartzea erraz dezaketen tresnei. Donostiako, Hernaniko, Errenteriako, Gasteizko eta Bilboko kasuak aztertuko dira, baita idatzi arren azkenean gauzatu ez ziren proposamenak ere; horien artean, Atotxako dorreko esku-hartzea eta Gasteizko Europan lehiaketako azken proposamen irabazlea. Santurtziko Auzo Zaurgarrietan Esku Hartzeko Plan Integrala ere aurkeztuko da, bereziki interesgarria udaletako eta beste erakunde batzuetako arduradun politikoentzat eta langile teknikoentzat.
Jardunaldiaren egitaraua
Eguneko egitaraua bi zatitan banatuta dago. Goizeko saioan 80/2022 Dekretua eta EAEko kasuak aztertuko dira. Ekain Olaizola Lizarralde SATIE Arquitectos estudioko arkitektoak aurkeztuko du jardunaldia, 10:00etan hasiko dena. Ondoren (10:30), Jonander Agirre Mikelez eta Iñigo Ocamica Berbois Balkoitu ikerketaren egileek «80/2022 Dekretua, desiotik abiatutako birgaitze-politika baten oinarri» hitzaldia emango dute, eta bertan bost euskal udalerritan aztertutako kasuak azalduko dituzte: Donostia, Hernani, Errenteria, Bilbo eta Gasteiz. Lehen zati hori amaitzeko, 12:30ak aldera, BeAr Architects estudioak hartuko du hitza, Santurtziko Auzo Zaurgarrietan Esku Hartze Plan Integrala aurkezteko.
Bazkalostean, 17:00etan ekingo zaio berriro jardunaldiari. Bigarren zatia Bartzelonako eta Euskal Autonomia Erkidegoko esperientziak aurkeztuko dira. Lehenik, Kataluniako Unibertsitate Politeknikoko (UPC) Grup Rearq ikerketa-taldeko kideek hartuko dute hitza, eta «Bartzelonako metropoli-eremuko bizitegi-multzo handien birsorkuntza irekirako sistema» aurkeztuko dute, 1960ko eta 1970eko hamarkadetan eraikitako etxebizitza-poligonoen birgaitzean oinarritua. Jarraian (17:45), beSTe arkitektura agentzia bat estudioak Euskadin egindako hainbat esku-hartze azalduko ditu «Balkoiak, galeriak, hondartzak eta arkitektura egiteko beste hainbat aitzakia» izeneko hitzaldian. Jardunaldia 18:30ean amaituko da, hizlari guztiek parte hartuko duten mahai-inguru batekin.
Jardunaldira joatea doakoa da eta herritar guztiei irekita dago, aurrez formulario honen bidez izena emanda: https://labur.eus/Balkoitu
BALKOITU!-ri buruz
BALKOITU! EAEn lehendik dauden etxebizitza-eraikinetan balkoiak gehitzeko inplementazio-azterketa bat da. Ikerketa Jonander Agirre Mikelez Arkitektura eta Ocamica Berbois arkitektura estudioek garatu dute, SATIE Arquitectos estudioarekin batera, eta Eusko Jaurlaritzaren ERAIKAL programaren laguntza izan du.
Proiektuak Euskal Herriko Arkitektoen Elkargo Ofizialaren eta EHUko Arkitektura Goi Eskola Teknikoaren laguntza jaso du.
-------------------------------------
Informazio gehiago nahi baduzu edo elkarrizketa bat egin nahi baduzu, jarri gurekin harremanetan:
Raquel López Viña
Komunikazio Saila | EHAEO Gipuzkoa
tel.: 943 320 194 / 68834213
H. el.: komunikazioa@coavginpuzkoa.eus
